July 06, 2020 at 9:16 AM
magtuturang dagli ng isang palaisipan
palaisipan na kailangang pagtuunan,
pagtuunan ng pansin at ng panahon;
panahong mahirap mahanap sa ngayon.
sa ngayon na ang lahat sa sarili ang tingin
at tingin sa sarili’y wala nang dapat alamin.
alam na ang lahat – ang hambog na dahilan
dahil daw karapatan ang pinagpipilitan.
pilit pinipilipit ang lahat ng katwiran
maituwid lamang mga kasinungalingan.
huwad daw at laos ang hindi umaayon
ayon sa kanilang nagtulak at sumang-ayon.
sasang-ayon na lang ba dahil sa marami?
o marami pa bang kasama’t kasapi?
kaisa’t kabisig sa adhika’t layunin;
layuning magbago ng walang babaguhin.
baguhin ang gawi at hindi ang nakasulat
sa nasusulat na kasaysayang nanggulat.
magulat man at mawala sa ikot ng mundo,
mundo ang iikot at hindi ang ulo at puso.
isasapuso ang totoo at paninindigan
titindig ng walang anumang kinatatakutan;
hindi takot sa kung sino, kung saan, kung paano
paano’t hindi nakinig kung kani-kanino.
kanino man nagmula itong abang pag-iisip
isipin nawa ang totoong kabuluhang masisilip.
masilip na ang saysay ng panahong tatalikuran
ay nasa bigat ng nalirip sa mga tinuran.
Photo Credit: @Hadassah Abella
Comments