IILAN NA LANG KAMI

May 5 2020 1:43 AM iilan na lang kaming marunong magbasa

at mga tunay ngang nagpapahalaga

sa tunay na dahilan at sa tunay na diwa

ng bawat damdamin at katagang isinatula.

iilan na lang kaming nagbabasa parin

sa bawat hangaring kalakip ay dalangin

na mapakinggan at sana'y mapansin

ang ngiti at luhang binulong sa hangin.

iilan na lang kaming nagbabasang pilit

sa mga salitang malalim, pusikit

na puno ng ano, paano at bakit

na mahirap ipinta, ililok, iukit.

iilan nga lang ba ang nagbabasa ngayon

sa mga pahinang niluma na ng panahon?

wala akong bilang na maitutugon

ang alam ko yung "kami", hindi marami 'yon.

kung kasama ka namin aabot ka dito

dahil ang hindi ay umayaw na at sumuko.

sa kanila'y banta ang makinig at matuto

masaya, mabilis ang sa kanila'y uso.

may sumulyap lang, tumingin sa pamagat

nagbasa ng konti at alam nya na lahat

kaya't huminto na at sa iba'y lumipat

ganun kagaling! mas marunong agad.

iilan na lang tayo? wala akong bilang

pero ito ang totoo kung pag-iisipan

ang tula at ritmo kung babasahin lang

ay may katwiran din at may kahulugan.

mababaw man o malalim ang tinig

ay mauunawaan ng tunay na umiibig;

kaya't sa wakas ng aking paghimig

alam ko kung Sino ang makakarinig.

#iilanNaLangKami #PanatangMakata