June 10, 2020 at 3:35 PM
namulat sa tambol ng pusong dumadagundong
sumambulat sa ragasa ng diwang ikinulong
nagulat, bumalikwas, bumangon ng paurong
sumulat nang bigla ang tintang nagmarunong.
hindi dalubhasa at halatang sumusubok lang.
ngunit kundi rin mahahasa aba paano nalang?
mali ba ang magnasa at mangarap man lang?
o mas mali ang umasa ng walang nasisimulan?
hayaang umagos ng umagos ang iyong panitikan
wala kang matatapos sa pangamba't alinlangan;
basta ba taos at totoo ang mga pagtuturan
kahit pa kapos ang ritmo, sukat at tugmaan.
lahat nagsisimula ng mangmang at hindi bihasa;
payat man at walang laman ay huwag mabalisa.
kaya't magmistulan mang maputik at basa,
umakyat, tumingala, mabusog sa tuligsa.
kung may makarinig sa awit, salamat ang sambitin.
o sa mga kibit-balikat man ay pasasalamat parin.
ang pinilit na liriko ay kadalasan puno ng hangin
kaya't pumikit lang ng mataimtim at manalangin.
aayon din sa dulo ang takdang kumpas ng bukas kaya pilit lang isaulo ang akdang hindi kukupas. lagi lang isapuso ang hakbang na may gilas sisikat din ang sulo sa wangis ng abang bumibigkas.
Comentarios