May 7, 2020 at 12:23 PM sa paglipas ng panahon at araw
unti-unting naglalaho ang lakas;
at kasabay sa paglabo ng tanaw
ay lumilinaw naman ang wakas.
halimuyak na minsang nagpabango
dahan-dahang nabubura sa hinagap
at ang tamis na minsang pumuno
ay hindi narin hinahanap-hanap.
ang dating matikas at malamyos
gumaspang na sa kulubot at kalyo;
ang mga dating porma at ayos
namilak na at dagling natuyo.
ang pinanindigang pagmamahal
ay siya nang kailangan ng alalay.
hindi narin naman magtatagal
kaya't sana ay huwag mangalay.
di hangad ang buong oras mo
pakinggan lang kahit sandali.
dahil sa dulo naman ng oras ko
ay hindi na maaabala muli.
hindi mahalaga ang bilang at tatak
makita ka lang naman ang habol;
at sa mga pawis mong pumapatak
pasasalamat ko ang iuukol.
ang taos puso mong ngiti
ang isa sa mga pumapanatag.
sinasagad lang mga nalalabi
bago ang Langit ay tumawag.
nawa ang itinanim na mga yakap
noong musmos ka pa't kalong,
ay maani kahit isang iglap
ng walang muktol at tanong.
sige hindi na patatagalin pa
at batid kong ika'y may gagawin;
ang sandaling pang-aabala
sana ay ipagpaumanhin.
sa paghayo ay may ihahabilin
nawa sa gunita mo ay maipanatili;
suklian man o 'di pansinin,
tandaang ika'y mahal…mahal parin lagi!
Comments